Jeneza lililobeba mwili wa Marehemu Brigedia Generali Hashim Mbita likiwa limebebwa na Wanajeshi
Picha na Reginald Philip
==============================
SALAMU ZA RAMBIRAMBI ZA MHE. BERNARD MEMBE, WAZIRI WA MAMBO YA NJE NA USHIRIKIANO WA KIMATAIFA WAKATI WA SHUGHULI ZA KUMUAGA MAREHEMU BRIGEDIA JENERALI HASHIM MBITA, TAREHE 29 APRILI, 2015
Mheshimiwa Jakaya Mrisho Kikwete Rais wa Jamhuri ya Muungano wa Tanzania na Amiri Jeshi Mkuu;
Mheshimiwa Benjamin William Mkapa; Rais Mstaafu wa Jamhuri ya Muungano wa Tanzania;
Mheshimiwa Mizengo Peter Pinda (Mb) Waziri Mkuu wa Jamhuri ya Muungano wa Tanzania;
Mama Ngeme Mbita Mke wa Marehemu;
Watoto wa Marehemu;
Wanafamilia;
Mheshimiwa Hussein Mwinyi Waziri wa Ulinzi na Jeshi la Kujenga Taifa;
Jenerali Davis Mwamunyange Mkuu wa Majeshi ya Ulinzi;
Mheshimiwa Abdulrahman Kinana Katibu Mkuu wa CCM;
Viongozi Mbalimbali mliopo hapa;
Mabalozi;
Waombolezaji;
Mabibi na Mabwana;
Nianze kwa kutoa salamu za rambirambi kwa niaba ya Wizara ya Mambo ya Nje na Ushirikiano wa Kimataifa na Serikali kwa ujumla. Kifo cha Brigedia Jenerali Hashim Mbita ni msiba mkubwa sio kwetu tu hapa Tanzania, lakini pia kwa nchi za Kusini mwa Jangwa la Sahara na bara lote la Afrika.
Nimelazimika kusimama na kuzungumza mbele yenu kwa kuwa pamoja na heshima kubwa aliyoipata kama mwanajeshi na nafasi zingine kubwa alizowahi kushika, lakini pia Mheshimiwa Hashim Mbita alitumikia Taifa lake kama Balozi wetu katika jiji la Harare nchini Zimbabwe kuanzia mwaka 2003 hadi mwaka 2006.
Kama ilivyoelezwa, Mheshimiwa Mbita atakumbukwa zaidi kama Katibu Mtendaji wa Nchi za Mstari wa Mbele (Frontline States) kwa miaka 22 akiwa nguzo muhimu katika harakati za kupinga ukoloni na kupigania Uhuru kwa nchi kadhaa za Kusini mwa Afrika. Iliyokuwa OAU na kwa ridhaa ya Mwalimu Julius Nyerere, Ofisi za nchi za mstari wa mbele ziliweka makao makuu hapa Dar es Salaam ambapo Jenerali Mbita aliitumikia kati ya mwaka 1972 hadi hadi mwaka 1994.
Ni harakati hizi hizi ndio ambazo zimepelekea Mhe. Mbita kupatiwa tuzo ya “Medali ya Sir Seretse Khama”, tuzo ya Umoja wa Afrika ya “Son of Africa” na pia “The Royal Order of Munhumutapa” iliyotolewa na Rais Robert Mugabe wa Zimbabwe mwaka 2014.
Ingawaje Mhe. Mbita ametutoka lakini Mawazo na uzoefu wake utabaki nasi daima. Kupitia SADC, “The Hashim Mbita Project” ambayo imeandika na kuhifadhi uzoefu, fikra na kazi zake itakuwa ni hazina kubwa ya Mwanajeshi, Mpigania Uhuru na Mwanadiplomasia Mtanzania. Ameiletea heshima nchi yetu na huyu ni Mkombozi wa kweli wa kupigwa mfano.
Tunajivunia utu wake na ndio maana leo, pamoja nasi tunafutwa mchozi na wenzetu. Naomba kuwatambulisha kwenu.
· Kutoka Namibia, Mheshimiwa Netumbo Nandi Ndaitwah, Naibu Waziri Mkuu na pia Waziri wa Mambo ya Nje.
· Uwakilishi kutoka Zimbabwe, Mheshimiwa Dr. Sydney Selelamayi, Waziri wa Ulinzi na Ujumbe wake.
· Uwakilishi kutoka Afrika Kusini, Mheshimiwa Nomaindia Mfeketo, Naibu Waziri wa Mambo ya Nje wa Afrika Kusini.
· Kutoka Msumbiji, Mheshimiwa Raimundos Domingos Pachinuapa, Mwakilishi wa Kamati Kuu wa FRELIMO.
Tunashukuru kwa kuweza kujumuika nasi katika msiba huu.
Kwa heshima na taadhima, tunatoa pole kwa familia na Watanzania wote. Mwenyezi Mungu ailaze roho ya Marehemu Mheshimwa Balozi Brigedia Jenerali Hashim Mbita mahala Pema Peponi.
Amina!
| 
